細公司，閪公司

ptc077

第一回-歡迎呢位新同事!!
「你就係今日開始返工果個新同事呀?」
「...係呀。」我帶著工作式既微笑望住呢位矮我少少既男人。
「你企左係到等左幾耐呀?」
「無~唔係等左好耐姐..」係囉,企左係公司門口半個鍾姐, 無咩既。
「聽日返工唔好返咁早啦, 我都係為左你先早左返黎。」聽到佢咁講我望一望我手錶, 原來已經十點.........
當日我見工請我個陣, 老世話呢份工朝九晚六, 但係因為我新入職未過試同期, 未會俾我揸鎖匙開公司門, 所以老世就叫我九點半先好返黎...
但估唔到最後我都仲要等多半個鍾先有第一個人返黎開門。
「入黎啦, 你個位係呢到, 你坐一坐先, 等你上司返黎俾野你做。」
「喔..好...我叫呀TIM, 你點稱呼呀?」我問呢位為左我肯早少少返工既男人。
「我叫呀MAX。」
佢一邊講一邊開晒公司既燈制,然後好俐落咁坐返埋自己個位, 然後再補多句:「你開部電腦, 睇下D EMAIL先, 我諗佢地都無咁早返。」
「喔...」第一日返工既我, 成隻鵪鶉咩都唔識, 所以佢講完之後我就真係跟佢講咁開電腦睇EMAIL。
唔...........
唔...........
唔..............?
睇左大約20分鐘, 除左有封EMAIL係順豐既月結單之外, 其他EMAIL完全唔知佢講緊咩。
卡
係開門聲!
終於有人返工啦!!
雖然人未見到, 但已經聽到兩把女人聲係到傾計, 我抬頭一望, 一個係老女人,一個係大肚婆...
老女人坐左係我後面, 而大肚婆就坐係我隔黎。
佢地兩個見到我都不約而同咁問呀MAX:「呢個就係新同事呀?」
「喔~係呀, 我叫呀TIM, 大家好。」我即刻同佢地打聲招呼。
大肚婆第一句就問我:「你今日幾點返到呀?本來平時係我開門架, 不過我大左肚所以先係MAX哥返黎開門, 唔該晒呀MAX哥。」
「我都唔係等左好耐姐, 等左陣呀MAX都返到黎開門。」
老女人接著就即刻講:「岩岩個位大肚婆叫呀WING, 我就叫SANDY, 拿呀TIM你要記住, 係呢間公司就小心D講野, 因為周圍都放晒CAM, 影到晒亦都聽到晒我地講咩架。」
「SANDY 你咪嚇人啦, 一陣又嚇走人咁BRIAN又無人用。」大肚婆WING姐咁講完之後, 我反而仲驚...
即係我之前已經有好多人坐唔耐呢個位...
到底係果位BRIAN有問題..
定係有其他原因呢...
卡!!
又有人返工啦, 今次入黎既係一個身型比較肥既男人, 年齡同呀MAX哥差唔多, 我諗都係大約35歲。
「喂, BRAIN, 呢個係你條新靚, 好好對人呀, 唔好又嚇走人。」
老女人SANDY見到BRAIN返黎就即刻講, BRAIN行行下停左係到望一望我, 然後同SANDY講:「車, 你呢段說話留返同你姐姐講啦!邊次唔係佢整走人?」
突然間, 一講起「姐姐」呢個人, 全個OFFICE靜晒...
「我地有咩留返一陣食LUNCH先講, 當係歡迎呢位新同事入黎我地公司」WING姐講。
「喔...好呀...」好彩WING姐咁講, .我都有好多野想問下佢地....

第二回- 食個飯先講啦!
之後一整個上午sandy, max哥, brain哥同wing 姐都係到做自己野, 無野俾我做。
Brain 有叫我睇下email先, 等食完飯返黎先俾野我做。
到左食lunch個陣, 我跟住佢地去公司附近既一間茶餐廳食飯。
「TIM, 呢份係你第一份工呀?」
「係呀, 畢業之後第一份工…」
「咁等我地嗌完野食之後先同你講, 我地公司有咩做要留意啦。」SANDY一邊睇個餐牌一面講。
我好好奇, 到底有d咩係要等到出到黎先講係公司唔講得。
「首先呢, 我地公司除左老世, 同老細個女之外, 公司就係我地呢到呢幾個人。MAX同BRIAN 就係同客溝通同跟單, WING姐就係幫MAX既, 而你就係幫BRAIN…」
「要做D咩我遲D再同你講。」Wing 姐即刻補一句。
「…我就做SHIPPING 既, 而你老世個女呢就係做會計既。」
「老世個女就係你口中所講既姐姐?」
「無錯啦, 你地估佢會唔會叫呀TIM跟埋佢會計D野?」Sandy 問其他三位同事, wing姐一聽到就好大反應咁講:
「梗係唔得啦!之前請佢個陣已經同老世講到明, 佢只會跟Brian既野, 絕對唔會跟姐姐D野。」
「老世講就梗係咁講啦, 到時佢個女話多野做個陣, 咪又係會叫呀Tim幫手。拿呀Tim, 你記住呀, 到時真係有野叫你做野既話, 記住SAY NO!」Max 哥特別強調SAY NO 呢兩個字..
「好難既, 你叫呀Tim點SAY NO 姐, 拿呀Tim, 見你第一次返工我教你啦, 對住姐姐呢類人, 最緊要就係拖, 佢俾咩你做你都話OK, 之後一路拖呀拖, 拖到佢最後自己拎返黎做就得。」Sandy咁教我, 但我覺得要拖老世個女俾既野難度都十分之高...
「總之你就小心啦, 就係呀姐姐搞到之前坐你個位既人大部份都坐唔長。」Wing 姐講完呢句就後我仲擔心....
「唔駛咁擔心, 總之到時有咩事你就話要做我D野, 唔得閒做佢D野就得架啦。」Brain 拍晒心口咁講。
「哈哈...到時我試下啦...佢地係下午先會返黎?」
「通常都係既, 上午都係得我地呢幾個人, 下午老世就同佢個女一齊返黎。」
「係呢, 點解你會黎做呢份工既?」Sandy特然轉左個話顯。
「嗯...因為公司同我住個到好跟, 我係屋企行返黎都係15分鐘就到..」
其實我真係無咩特別原因要做呢份工, 人工唔係高, 我真係見佢近屋企先返...
當然仲有一點就係我其實唔多識處理人際關係既事, 所以我特登選擇一D細公司做。
我曾經去個大公司做暑期工, 結果就係頂唔到入面既制度同人事之下, 做左個半月就無做, 希望我呢份工唔會咁啦....
睇黎都要同「姐姐」呢個人保持返D距離好D....

第三回- 你好呀, 我係老世個女~
食完個飯返到公司之後, Brain 就教帶左我去一個細房入面, 細房可以直接望到辦公室咩情況, 然後佢話:
「拿, 下午老世佢地隨時會返黎, 唔好俾你睇到無野做咁坐係位, 而家教你做一樣野, 呢樣野好基本但係又有D技巧。」
「喔..好丫..」
Brain 教我既係卡布, 即係係布料上面用一個特別既圓形切刀切一個圓形, 然後去磅下呢塊布幾重。
我見Brain左手一塊布放係膠墊上, 右手放個圓形切刀一扭, 輕輕鬆鬆就切到一塊完美既圓形布。
我睇落係好簡單, 但到我自己做個陣就揦手唔成勢, 大力又唔得, 細力又卡唔到...
「一開始係咁架啦, 練多幾次就得, 呢到有塊布, 你慢慢練下啦。」
如是者, 我就拎住塊布係細房到卡卡卡卡卡。
大約到3點個陣, 公司個門又傳出開門既聲音, 然後有兩個人影係我眼邊閃過, 之後我就聞一陣好濃烈既香水味....
睇黎係老世同佢個女返左黎....
因為我見到其他人見到佢地入黎之後做野即刻快手左..
我無理咁多, 繼續係細房卡布..
過多大約十分鐘之後...
「你好呀新同事, 你叫呀SAM?我係老世個女呀, 叫我Mandy就我架啦~」隨著老世個女講既, 佢身上既香水味令到我極之辛苦。
「喔...你好呀。」我望清楚佢個樣, 化妝都化得好勁, 同埋佢第一句就話自己係老世個女, 令到人覺得佢想講
「我係老世個女呀, 我講咩你最好就跟住做, 唔係就督你背脊」, 當然呢D只係我自己諗出黎, 可能佢真係純粹普通地打個招呼...
「而家幫你整左個門卡先, 唔係你次次出入都要搵其他人張卡。」
「即係有呢張門卡朝早就開到門?」
「唔係呀, 我地每晚都會鎖門先走, 我遲D先俾條鎖匙你啦, 而家係跟我出黎搞左張門卡先...你而家做緊既野唔急架可?」
「唔急, 可以遲D先再做。」
「咁你跟我出黎。」
........
之後我到放工之前我都係去左整門卡, 簽幾份入職文件, 見老世打聲招呼傾下計咁.......
第一日返工就係咁平淡咁完左, 但係臨走個陣, Wing姐細細聲咁提我..
「姐姐叫你做既野, 你一定要推呀。」