|
|
5
正當我真心真意咁相信佢同Michelle真係分咗手，係出發前一晚我又忍唔住再次㩒入Michelle個ig到。
原來Michelle因為要去summer exchange，所以佢五月份開始就唔係香港，七月頭先會再返嚟。
「我唔係香港要乖乖地啊，我地七月再見。」呢個係Michelle其中一張相嘅caption，相入面係一雙十指緊扣嘅手。
唔洗審都知係Jerry嚟。
我諗失望係有限度，當一個人三番四次咁令你失望，你會失望到唔會再失望。
我諗我當刻嘅心情就係咁樣。
我係咁問自己，到底係咁樣嘅情況下，我仲應唔應該同佢去旅行？
我明知道佢地未分手。
呢個係好鐵一般嘅事實。
有啲骨氣同尊嚴嘅話，我應該大鬧佢一餐然後走咗去。
不過我亦知道只要我扮唔知，或者我仲可以換一次開開心心嘅旅程，同佢兩個人嘅旅行。
貪心同自私係人嘅本性，好難有人會因為理智而抵受慾望嘅誘惑。
所以我選擇咗後者。
－－－－－－－－
Jerry比我早一日到步，所以佢會係京都等我。
「乘搭前往日本關西國際機場嘅航班UO3989現在可以登機，請各位旅客前往櫃檯，多謝。」機場嘅廣播聲響起，我提起手上面嘅旅行袋，一步步咁行近登機櫃檯。
Jerry：09:47 你上機未？
我：09:48 而家登機
Jerry：09:50 咁我地京都見
我嘆咗口氣，拎咗本護照同機票出嚟比地勤人員核對，個心仲猶豫緊應唔應該上機。
「小姐？可以行架喇。」個地勤女仔係我面前揮揮手，
「哦，好呀，唔該。」我先識得比反應向前行。
本來呢個係我嘅畢業旅行，我應該無憂無慮、開開心心咁出發先啱；但係我呢刻仍然掙扎緊我到步之後應唔應該搵Jerry好。
Jerry：10:01 落機話我知，到時我係京都車站接你
結果我都係選擇咗去搵佢。
或者呢次旅程對我嚟講係個有始有終嘅結尾。
過埋呢十日之後，我就要逃離呢個人，永遠。
－－－－－－－－
日本對我嚟講係個陌生嘅國度，因為呢次我都係第一次嚟呢個地方。
經過三個幾鐘嘅機程，飛機終於降落係日本關西國際機場。
意味住我好快可以見到Jerry。
我走出機場之後跟住人群走到JR站，望住縱橫交錯嘅鐵路路線圖，終於明白點解啲人話係日本好容易搭錯車。
我買咗張去京都嘅車飛，係whatsapp同Jerry講咗聲，我就上咗JR。
沿途我不斷地諗到步之後我應該用咩態度對佢，開心定憤怒、高傲定低姿態，最後我覺得咁樣諗太作狀，既然選擇咗就開開心心咁玩，唔好再擺咩態度出嚟。
因為返到香港就無機會。
我一出京都車站，就見到Jerry企咗係車站外面嘅空地等我。
佢一見到我就拖住我隻手。
「做咩啊？你咁樣我會亂諗架。」我好細聲咁講。
「返到香港就唔好亂諗喇，哈哈。」當時佢笑住咁答我。
所以話可憐人必有可恨之處，其實佢根本無呃我，只係我自己願意咁樣做。
我唔想破壞氣氛，唯有將心裡面嘅委屈同難受都通通吞哂落肚；更加係佢面前一笑置之。
只要我假裝毫不在意，至少成件事都無咁難睇。
我住嘅民宿比較近車站，所以佢陪我去安置咗行李後先再出去。
我默默地任由佢拖住我係街上走，然後佢帶我去間唔係好起眼嘅拉麵小店。
「好唔好食架。」我指住個門口「雖然我聽人講日本求其入一間餐廳都好好食。」
「我幾時有介紹錯你，唔好睇佢好簡陋咁，臥虎藏龍架。」
之後佢就拉咗我入去。
坐低之後，我諗住好似叫subway咁，指住個餐牌「this,this,this..」就算，之後Jerry問完我食咩，佢就用一口流利嘅口語向店員落單。
「吓，乜你識日文架？」我驚訝地問佢。
「識少少喇，以前有學過。」佢滿臉自信咁講：「我唔識日文點敢帶你周圍玩呀，哈哈。」
兩碗拉麵到咗之後，拎起對筷子抹一抹，遞咗比我；然後再抹另一對比自己。
「望咩呀，快啲食喇。」佢係我面前揮一揮手。
我「哦」咗聲就開始食，唔知點解碗麵其實幾好食，但係我覺得有啲酸味。
明明我應該好討厭佢，但係我真係做唔到，仲要覺得佢識好多嘢、好細心。
有時候我真係好倆服自己感情用事嘅程度可以去到如此盲目。
－－－－－－－－
因為京都嘅店鋪一般都比較早閂門，所以當晚我地行到九點幾佢就話送我返民宿。
我地手拖手係昏黃嘅街燈下踱步，沿途只有數個路人；我嘅步速刻意比平時走得更加慢，就好似拖行住千噸重物係身後咁緩慢。
「做咩行得咁慢嘅，好攰呀你？」佢拉一拉我隻手。
「無呀，食飽慢慢行消化下唔好咩？」我微微一笑。
只有咁樣嘅步速，我先可以無理由地見多佢一陣。
佢聽到之後無講啲咩，我地又繼續咁樣行落去。
我諗如果我地之間嘅關係唔係咁，呢種氣氛對我嚟講絕對唔會係如此一片慘然。
「聽日你想去邊？」係民宿外面條小馬路，未到深夜時分已經空無一人，連車都唔多一架。
呢到嘅日夜溫差比較大，我落機嘅時候只係著住件短袖上衣，但係而家就算著住件薄外套都覺得涼意森然。
「無咩特別，等你帶我玩囉。」我咩都無plan就嚟咗，因為我只係在意同Jerry一齊過，行程係點、去邊到都已經無所謂。
「咁我帶你去宇治食抹茶，好無？」佢摸一摸我個頭。
我又再點點頭。
就係我地道別之前，我又忍唔住伸手擁抱佢；然後佢輕輕係我唇上點咗一下，就笑住同我講再見。
望住佢係馬路上消失嘅身影，我心裡面萬般唔捨得。
因為咁樣就過咗我地剩餘嘅十分之一。
－－－－－－－
宇治比我嘅感覺係一個有好多抹茶嘅窮鄉僻釀，個到係一片平地，咩都無，只有一堆專食抹茶嘅餐廳同一啲賣手信鋪頭，其餘就係住宅，就連一個小型商場都無。
其實我一啲都唔鐘意食抹茶，唔鍾意嘅程度未至於討厭；但係萬一有一日呢樣嘢係呢個世界上面消失得無影無踪，我都唔會因而覺得惋惜，我諗大概係咁樣。
「抹茶之鄉真係成個鄉下咁。」我一出車站就忍唔住輕笑。
「係呀，呢到成條街大部份嘅鋪頭都係賣抹茶嘢，所以啲女仔嚟親都好興奮。」佢指住馬路兩側嘅商店。
「哈，係咩。」我嘗試一下興奮，可惜真係提唔起興趣。
「你想試邊間呀？公廁啲就呢間，想試老店就帶你行入少少個間。」佢指住我地面前嘅中村藤吉本店，我揀咗後者。
沿住平等院表參道行，一陣陣茶葉嘅餘香飄盪係空氣之中，不禁讓人心曠神怡起來。
「喂，你企定係到。」行行下，我叫Jerry唔好郁，然後用相機快門記錄咗佢此時此刻嘅樣貌。
之後我地之間就只會得返呢啲我親手影嘅相。
「呢到啲鋪頭好多都成百年歷史架，我帶你去個間超過二百年添呀。」Jerry手舞足蹈咁講。
「就試下同香港個啲有咩分別。」
我地坐低咗之後，叫咗個焙茶蛋糕同抹茶糰子。
個焙茶蛋糕用個好精緻嘅碟裝住，上面除咗有蛋糕以外隔離仲有幾舊生果係到，仲有一團白色嘅鮮忌廉，我唔知呢個組合同配搭有咩意思，但我眼前嘅食物就係咁嘅樣。
我試咗一啖，我食唔出有任何茶味，先唔好講話係抹茶定焙茶。
「喂，我覺得同原味嘅蛋糕無咩分別喎，多幾舊生果忌廉就收我千幾二千yen。」我毫不客氣咁講。
「係咩？等我試下。」佢拎起枝叉食咗一啖：「又真係無乜味。Miche...Matt又話好食嘅。」
其實點會聽唔出佢想講Michelle。
唔洗審呢間嘢又係Michelle推介，分分鐘佢就係個啲所謂嘅抹茶控。
「呢啲都係唔啱我食，試一次就夠。」我只有扮聽唔到，先唔會破壞到原本好正常嘅氣氛。
「今晚同你食其他野囉，哈哈。」
我地食埋枱上面嘅嘢，就去咗鋪頭隔離嘅手信店到買嘢。
我見Jerry係咁睇啲同抹茶嘅有關嘅產品，睇完又影一張，放低之後又攞第二件上手再影，然後係whatsapp到send比同一個人。
「幫人買嘢呀？」我刻意提高聲線咁講。
「哦，係呀，個朋友好鍾意抹茶，睇下佢想要邊啲咋嘛。」
我偷望到whatsapp個對話框盡係Jerry嘅自拍同佢去嘅地方，就好似現場直播佢旅行嘅情況比Michelle睇咁，唯獨係我呢個外人唔會係相片之內。
當然，呢個係合理不過嘅事。
明明知道佢啲手信係買比Michelle，我仲要裝傻作瘋咁默默跟住係佢後面陪佢買。
我膽怯，我唔敢破壞成個行程，因為我知道主導權唔係我手；萬一我發脾氣，分分鐘就連呢幾日嘅快樂都會化為烏有。
所以我選擇苟且偷生地存在係佢地兩個之間，哪怕只係得幾日都好。
－－－－－－－－－
夜晚我地無再去食拉麵，因為大家都諗唔到食乜，所以只係隨意地入咗間居酒屋。
呢間居酒屋其實同香港食串燒嘅鋪頭幾相似，啲日本人都係叫啲串燒，然後再叫酒飲。
我地兩個都未食嘢，所以叫咗幾串燒物、一條燒靖魚，我要咗碗湯烏冬，Jerry就食飯。
「叫唔叫啲清酒飲下？」Jerry落哂啲嘢食之後望一望我講。
「好呀。」
於是我地當晚就飲起酒嚟。
「時間過得好快囉，咁樣就一年喇。」
佢講起我地個次嘅河內之旅：「諗返起，如果唔係你個時跌咗個銀包比Matt見到，我地都唔會識。」
「都唔知咁樣係好事定壞事。」
我飲咗一啖清酒，一股暖流頓時湧入喉嚨：「估唔到之後會發展到咁樣。」
我諗佢知道我指嘅係佢同我之間嘅關係，所以佢只係笑一笑，咩都無講，然後再話：「今晚飲酒就諗起個次Matt醉到仆街，仲要我地送佢上去，哈哈。」
「係囉，仲要嘔到周圍都係，好彩無係車到嘔咋。」我愈飲愈起勁，明明酒量唔好都猛咁灌啲酒落肚。
我諗我已經再無任何顧慮，反正我醉咗一定會有Jerry照顧我，起碼呢一刻係日本佢會咁樣做。
我一杯又接一杯，不知不覺間已經飲咗好多。
至少已經超出咗我嘅酒量範圍。
「喂，你因住呀，你飲咁多得唔得架。」
我感覺上臉上一陣灼熱，亦開始有少少頭昏腦漲嘅情況，Jerry見狀馬上撳低我拎住酒杯嘅手：「不如唔好飲喇。」
「我醉咗你會睇住我架嘛，係咪？」其實我唔係真係話好醉，只係感覺到身體有輕微向下墜嘅感覺，但係又不至於會不省人士嘅地步。
「好喇，比你放縱一晚。」
我係日本都唔放縱，仲有幾時可以放縱。
於是，我抱住個醉醺醺嘅身體離開，身邊嘅Jerry用手支撐起我成個人。
「你今晚想唔想返去瞓呀？」佢係我耳邊問我。
我擰擰頭，將身體更加靠向佢。
佢無講咩，然後我就比佢扶咗去佢住嘅民宿。
個到一共有兩層，好好彩佢係住係地下個層，所以我唔洗再行樓梯先入到房。
我一入到房就軟軟地攤係佢張床到。
「我倒杯暖水俾你。」佢轉身出去，隔咗無幾耐又返咗入嚟。
佢將我重新扶起來，話咗我一句：「唔飲得唔好學人飲嘛。」
然後佢遞咗杯水係我個口面前，我飲咗少少。
我又伸手攬住佢：「我唔想返香港，我唔捨得你。」
酒精係大腦散發之後，連講嘢都比平時更加真心真意。
呢個時候先敢將最真實嘅說話講出嚟。
「傻妹，我而家咪係到囉。」佢輕聲地講，之後摸一摸我把長髮。
我忍唔住係佢懷裡面喊咗出嚟，但係我唔敢喊出聲，只敢係佢衣襟之上默然流淚。
「做咩啊你？」佢可能感覺到胸口漸漸變濕，所以佢移開我個身，此刻我淚流滿面。
「你唔好喊喇...」佢又再新將我擁入懷裡：「開開心心咁過埋佢，好無。」
我無言以對，心裡面明知呢個係唯一方案；但係又不甘咁樣就判自己死刑。
佢抱起我塊面，輕輕地錫落嚟，雙手係我髮際間慢慢向下滑，再緊緊抱住我嘅腰部。
我夾住淚水咁同佢接吻，心裡面百感交集，大概係諗起剩餘嘅日子得返好少。
死亡個刻並唔可怕，最可怕係你確確實實知道死期，然後逐日倒數個日嘅來臨。
我唔想倒數我地嘅時間。
我將自己嘅雙手圈係佢頸後，係佢耳際、頸部都輕輕吻過，然後同佢嘅嘴巴重新連接起來。
我慢慢脫起自己嘅上衣，胸前已無一物。
我不顧一切地將自己完全呈現係佢面前，或者因為同佢已經唔係第一次，所以整個過程好順利。
係佢真正進入我身體之前，佢再問多我一句：「你知道自己做緊咩架可？」
我無答佢，只係將身體頂得更上，等佢可以更加容易插入我嘅裡面。
我地當晚做咗三次，感覺係將餘生可以做愛嘅時間同力氣都用盡一樣。
－－－－－－－－－－
呢晚之後，我每日都好似真係同佢拍緊拖一樣，做盡女朋友嘅角色同本份，外人看起上嚟儼如一對羨煞旁人嘅情侶咁。
沿途嘅日子，我幫Jerry影咗低好多張相，每一張都係佢最自然最真實嘅一面。
「唔好淨係你幫我影喇，你同我影返張好無？」旅程嘅尾聲，佢忽然間咁講。
當時我地身處金閣寺，因為佢知我想睇世界文化遺產嘅建築，所以佢帶咗我嚟。
「吓，我無腳架喎。」
「叫人幫我地影囉。」
之後佢向一對同我地年紀相若嘅日本情侶揮揮手，然後用日語同佢講咗陣。
「嚟喇！」佢衝向我身邊，然後攬實我個膊頭，我都將身體微微傾向佢。
呢張相係我喺日本影得最靚嘅一張相。
因為只有呢張相先證明到我同佢呢段關係係確確實實地存在過。
－－－－－－－
旅程完結後，我地分別乘搭唔同嘅航班返香港。
原本我真係好唔捨得，唔捨得到我想義無反顧地違反自己守過嘅諾言，繼續同佢糾纏落去。
不過Jerry比我更早一步block哂所有同我可以聯絡嘅途徑，甚至連我打電話過去都無再聽過一次。
我黯然地㩒入Michelle嘅ig，見到Jerry原來返香港無耐就飛咗去英國搵Michelle。
呢個消息就好似一個大鐵鎚咁，一嘢將我僅有嘅希望敲至粉身碎骨。
最後我將Michelle嘅ig都封鎖埋，而Jerry嘅一切聯絡方法都清空得一乾二淨。
我唯獨唔捨得刪去嘅，就係喺我鏡頭之下嘅Jerry，同埋我同佢唯一一張合照。
我將啲相放咗係一張記憶卡裡面，收埋係一部壞咗相機入面，永遠都唔比自己有機會拎返出嚟用。
三年後，Matt又再搵返我，同我講Jerry準備同Michelle結婚。
呢個時候我先將個部已經封塵嘅相機重新拎出嚟，好細心咁抹咗一次上面嘅塵埃；我打開果十日為Jerry留下嘅每個快門，最後仲有我同佢嘅合照。
我逐張、逐張咁睇咗一次，比之前睇嘅任何一張相都仲要仔細，然後我終於捨得刪除全部相片。
事隔數載，我終於願意清空哂一個壞相機裡面嘅回憶，將呢個秘密永遠地埋藏係三年前嘅日本，再無任何憑證留係呢個世界上面。
－完－ |
|
置頂卡
變色卡
樓主
